Кобрынская сінагога — гістарычны будынак другой паловы XIX стагоддзя, помнік архітэктуры.

Кобрынская сінагога з'яўляецца помнікам эклектычнай архітэктуры з элементамі класіцызму. Будаўніцтва сінагогі датуецца другой паловай ХІХ стагоддзя. Яна ўнікальная сваімі памерамі, з'яўляецца адной з самых вялікіх у Беларусі.

Базілікальны бязвежавы храм. Мае сіметрычную аб'ёмна-прасторавую кампазіцыю. Цэнтральная трохпавярховая частка галоўнага фасада вылучана 4 плоскімі лапаткамі. Такія ж лапаткі фланкіруюць будынак па кутах. Другі і трэці паверхі прарэзаны невысокімі паўцыркульнымі аконнымі праёмамі, першы паверх — лучковымі. Элементамі дэкору з'яўляюцца падаконныя плоскія нішы, фігурная рустыка лапатак на першым паверсе, аркатурныя паясы.

Да 1941 года насельніцтва Кобрына было пераважна яўрэйскім. У гады вайны сінагога стала свайго роду цэнтрам гета, у якое фашысты сагналі яўрэйскае насельніцтва з усёй акругі. Пры ліквідацыі гета менавіта тут, ля сцен сінагогі, быў зроблены апошні расстрэл. Пасля  вайны сінагога ўжо не была дзеючай. Падчас антырэлігійнай барацьбы ўлады закрылі сінагогу. Уся каштоўная маёмасць была вывезена, а будынак выкарыстоўваўся ў вытворчых мэтах. У 80-х гадах тут размяшчаўся цэх па вытворчасці піва, а затым безалкагольных напояў Кобрынскага кансервавага завода. З канца 80-х будынак быў цалкам безгаспадарным і паступова прыходзіў у запусценне. У 2001 годзе будынак быў перададзены яўрэйскай грамадскасці для стварэння яўрэйскага культурнага цэнтра. На жаль, культурны і рэлігійны цэнтр яўрэйскага народа цяпер знаходзіцца ў закінутым выглядзе.

Дата публікацыі: 28.09.2023.

---

Для зручнай навігацыі па славутасцях выкарыстайце БЯСПЛАТНУЮ мабільную праграму