Мінск. Помнік Сымону Буднаму і Васілю Цяпінскаму


Other, krokapp.byhttps://krokapp.by/media/sound/77ba5a8c-04d7-43e9-a275-b2d426657b04.mp3

Скульптурная кампазіцыя, прысвечаная Сымону Буднаму і Васілю Цяпінскаму, была ўсталявана ў скверы Беларускага дзяржаўнага ўніверсітэта ў 2000 годзе.

Сымон Будны і Васіль Цяпінскі з’яўляюцца дзеячамі Рэфармацыі ў Беларусі. Абодва будучыя рэфарматары нарадзіліся ў 1530-я – 1540-я гады. Сымон Будны быў тэолагам і перакладчыкам Бібліі, які ўсё жыццё змагаўся за царкоўную Рэфармацыю. Дзякуючы падтрымцы канцлера Вялікага Княства Літоўскага Мікалая Радзівіла Чорнага ён выдаў у Нясвіжы ў 1562 годзе беларускамоўны пратэстанцкі “Катэхізіс”. Гэта кніга стала найбольш папулярным у тыя часы школьным падручнікам.

Васіль Цяпінскі, таксама як Францыск Скарына, перакладаў біблейскія тэксты на беларускую мову. Яго жыццёвая пазіцыя і погляды былі блізкія з поглядамі Сымона Буднага. Выданне Евангелляў у перакладзе на беларускую мову, якое пабачыла свет у 1570 годзе, Васіль Цяпінскі тлумачыў тым, што перакладзенае такім чынам Слова Божае будзе зразумела простым людзям і дазволіць ім асабіста спазнаць Ісуса Хрыста.

Помнік Сымону Буднаму і Васілю Цяпінскаму ўсталяваны на невысокі пастамент, прыгожа абкладзены пліткай. Дакладна вядома, што Васіль Цяпінскі і Сымон Будны былі знаёмыя. Таму аўтар скульптурнай кампазіцыі Ігар Голубеў паказаў, як яны сядзяць на лаўцы і вядуць нейкую дыскусію.


Для зручнай навігацыі па славутасцях выкарыстайце БЯСПЛАТНУЮ мабільную праграму

Спампаваць Спампаваць