Адзіны помнік Кастусю Каліноўскаму ў Беларусі.
Невыпадкова, што адзіны пакуль што ў Беларусі помнік кіраўніку нацыянальна-вызваленчага паўстання 1863 – 1864 гадоў Кастусю Каліноўскаму ўсталяваны менавіта ў Свіслачы. З гэтым старадаўнім мястэчкам звязаныя многія падзеі ў ягоным жыцці. Непадалёку ад Свіслачы размяшчаўся фальварак Якушоўка, куды сям’я Каліноўскіх пераехала з Мастаўлянаў (цяпер гэта вёска на тэрыторыі Польшчы). У Свіслацкай гімназіі Кастусь Каліноўскі вучыўся разам са сваім старэйшым братам-аднадумцам Віктарам. Дарэчы, на старых свіслацкіх могілках захавалася магіла Віктара Каліноўскага, заўчасна памерлага ад сухотаў. Помнік быў устаноўлены ў 1958 годзе. Ён знаходзіцца каля будынку сярэдняй школы. Аўтар помніка — знакаміты беларускі скульптар Заір Азгур. Помнік уяўляе сабой пагрудны бронзавы бюст вышынёй у адзін метр 5 сантыметраў. Бюст пастаўлены на высокім трохметровым пастаменце пірамідальнай формы. Кампазіцыя бюста ажыўлена рухам рукі, якая трымаецца за штрыфель фрака.
Дата публікацыі: 01.08.2017.
Для зручнай навігацыі па славутасцях выкарыстайце БЯСПЛАТНУЮ мабільную праграму