У гістарычным цэнтры Слоніма знаходзіцца галоўная сінагога. Слонімская сінагога з'яўляецца адным з чатырох габрэйскіх малітоўных дамоў у Беларусі, дзе захавалася Біма – шмат'ярусная вежа, на вяршыні якой чыталася Тора.

Вялікая сінагога ў Слоніме ўзведзена ў 1642–1648 гадах. Яна стала адным з важных вузлоў у сістэме абарончых збудаванняў горада. Мэты бяспекі абумовілі абарончы характар архітэктуры збудавання: тоўстыя сцены, адсутнасць архітэктурнага дэкору, высока ўзнятыя арачныя аконныя праёмы. Асабліва манументальны ніжні ярус (таўшчыня сцен – 1,7 метра) з шэрагам нізкіх вокнаў-байніц. У цэнтры размешчана круглае акно-разетка.

У 1881 годзе сінагога моцна пацярпела ад вялікага пажару. Аднак дзякуючы ахвяраванням вернікаў яна хутка была адноўлена. Сінагога заставалася дзеючым храмам да 1940 года, калі была зачынена, у адпаведнасці з антырэлігійнай палітыкай савецкай улады. Пасля Другой сусветнай вайны будынак выкарыстоўваўся пад склады.

У 2001 годзе будынак сінагогі быў перададзены ва ўласнасць Юдэйскаму рэлігійнаму аб'яднанню ў Рэспубліцы Беларусь і знаходзіўся на рэстаўрацыі, якая, аднак, не была завершана. У 2010 годзе перададзена ва ўласнасць аддзелу культуры Слонімскага райвыканкама. У пачатку 2021 года будынак сінагогі набыла на аўкцыёне за 30 тысяч беларускіх рублёў дзіцячая пісьменніца і педагог з Мінска Ілона Караваева (псеўданім Іяанна Рыўз).

Дата публікацыі: 16.06.2017.

---

Для зручнай навігацыі па славутасцях выкарыстайце БЯСПЛАТНУЮ мабільную праграму