Касцёл Найсвяцейшай Тройцы — рымска-каталіцкі храм, пабудаваны ў 1899—1903 гадах. Ён уваходзіць у тройку самых высокіх храмаў Беларусі — вышыня званіцы складае 61 метр — і з'яўляецца адным з самых лепшых узораў неагатычнага стылю ў краіне.

Каталіцкая парафія ў Гервятах была створана ў 1526 годзе. Тады ж быў пабудаваны невялікі драўляны храм. У 1899—1903 гадах на яго месцы па праекце віленскага губернскага архітэктара Аляксея Полазава быў узведзены велічны мураваны храм. Для будаўніцтва Траецкага касцёла ў Гервятах недалёка ад вёскі быў пабудаваны часовы цагляны завод, які вырабляў цэглу вельмі высокай якасці. Вапну здабывалі таксама непадалёк, а для ўмацавання вапнавага раствору, з дапамогай якога будаваўся храм, выкарыстоўваліся курыныя яйкі, якія тысячамі штодня збіраліся і дастаўляліся на будоўлю з усёй акругі. Многія будматэрыялы, у тым ліку чарапіца для даху, дастаўляліся з Германіі.

У ходзе бурных гістарычных падзей першай паловы ХХ стагоддзя ў Гервятах неаднаразова мянялася ўлада. Аднак касцёл перажыў усе войны і ліхалецці і ні разу не быў сур'ёзна пашкоджаны. Касцёл і сёння знаходзіцца ў выдатным стане і з'яўляецца дзеючым. Акрамя набажэнства ў будынку храма таксама праводзяцца канцэрты арганнай музыкі.

Касцёл Найсвяцейшай Тройцы ўяўляе сабой трохнефную аднавежавую базіліку з трансептам у заходняй частцы, накрытую двухсхільным дахам з чырвонай дахоўкі. З усходу да галоўнага нефа прыбудаваная высокая двух'ярусная вежа-званіца. У алтары зберагліся фрагменты каляровых вітражоў.

Дата публікацыі: 20.07.2022.

---

Для зручнай навігацыі па славутасцях выкарыстайце БЯСПЛАТНУЮ мабільную праграму