Магілёўскі драматычны тэатр
Магілёўскі драматычны тэатр стаў першым на тэрыторыі Беларусі асобным спецыяльным тэатральным будынкам. Яго наведвалі людзі, што тварылі гісторыю і ўвайшлі ў яе назаўжды.
Доўгі час у Магілёве не было тэатральнага будынку, а спектаклі праходзілі ў прыватных дамах заможных гараджан. У 1870-я гады ў адміністрацыі Магілёўскай губерні з’явілася ідэя аб будаўніцтве ў горадзе ўласнага тэатра. Абвясцілі збор сродкаў, у якім удзельнічалі шырокія пласты грамадскасці. Да 1886 года неабходную суму сабралі.
Аўтарамі праекта сталі магілёўскі губернскі архітэктар Пётр Камбураў і інжынер Уладзіслаў Міляноўскі. Месцам для ўзвядзення тэатральнага будынка выбралі плошчу каля Мураўёўскага сквера – на скрыжаванні Дняпроўскага праспекта (зараз гэта вуліца Першамайская) і вуліцы Дваранскай (зараз вуліца Камсамольская). Гэта месца было найбольш зручна наведваць жыхарам усіх частак горада. Будоўлю распачалі ў 1886 годзе і завершылі ў канцы 1888 года. А ўжо ў 1889 годзе трупа Георгія Дзеркача адкрыла першы тэатральны сезон у Магілёве.
У савецкі час тэатральны будынак выкарыстоўвалі па прызначэнні. У 1953 годзе ў Магілёве стварылі тэатр з пастаяннай трупай, які дзейнічае і па сёння. У сярэдзіне 1980-х гадоў Міністэрства культуры БССР прапанавала знесці стары будынак тэатра, а на ягоным месцы пабудаваць новы. Аднак гэта прапанова выклікала негатыўны грамадскі рэзананс, і ад зносу адмовіліся. У 1992 годзе пачалася рэкаструкцыя тэатральнага будынка. І толькі ў 2001 годзе тэатр зноў адчыніў дзверы для гледачоў. На сёння будынак Магілёўскага драматычнага тэатра ўяўляе сабой прамавугольнік, у цэнтры якога размешчана тэатральная зала на 500 месцаў. Галоўны фасад упрыгожваюць два вежападобныя аб’ёмы. У аздабленні інтэр’ера шырока выкарыстана разьба па дрэве.
У 2003 годзе перад пачаткам новага тэатральнага сезона каля галоўнага ўвахода адбылося адкрыццё бронзавай скульптурнай кампазіцыі “Дама з сабачкам” (скульптар Уладзімір Жбанаў). А ў 2008 годзе будынак Магілёўскага тэатра унеслі ў спіс гісторыка-культурных каштоўнасцяў Рэспублікі Беларусь.
Дата публікацыі: 12.06.2017.
Для зручнай навігацыі па славутасцях выкарыстайце БЯСПЛАТНУЮ мабільную праграму
